علوم الزقازيق حق روان لازم يرجع يتصدر محركات البحث
اليوم :
يوم 2025/5/4
هاشتاج علوم الزقازيق حق روان لازم يرجع يتصدر محركات البحث ..
الموقف وكأنه مشهد سنيمائي ...
شاهد عيان على الواقعة
الوقت : تقريبا حوالي الساعه 1:40 لحد الساعه 4
وقت مش هيتنسي في دماغ اكتر من 500 طالب وطالبة
المكان : كلية العلوم بجامعة الزقازيق مبنى رياضة
الشباب في القاعات ال بيمتحن وال بياخد محاضراته يسمعوا صوت خبطة جامدة اوي
ولما الشباب تطلع تلاقي طالبة واقعة من دور عالي من على السلم تقريبا الدور الخامس وقعت على دماغها وسايحه في د.....مها
الناس بتتجمع الصوت بيعلى الكل بيسأل في ايه و اي الصوت ده ويبدأوا يقربوا يلاقوا بحيرة دم وجنبها جثة طالبة،
الصوت بيعلى أكتر والناس بتتجمع اكتر وكله بيقول حد يكلم الاسعاف،
ووسط ما الناس بتتفرج على المنظر منتظرين حد مسؤول ييجي، بينزل بعض الشباب على الأرض يشوفوا هل فيه نبض ومش عارفين يحددوا،فيه نبض ضعيف فعلا ولا هم ال بيتمنوا تكون عايشة ويصرخوا بأعلى صوتهم اتصلوا بالاسعاف بسرعة يمكن نحلقها،
والمسؤولين شرفوا والشباب شاهدة مين حاول يساعد ومين وقف يتفرج زيه زي الطلبة،
وجت السيدة المحترمة المسؤولة عن الإسعافات الأولية ونلاقيها منهارة من العياط ومش عارفة تعمل حاجة،
وينزل تاني الشباب يحاولوا بكل الطرق ينعشوا عضلة القلب بكل الطرق الممكنة يمكن ربنا يمد في عمرها لحد ما الاسعاف تيجي،
الوقت بيعدي والشباب بتصرخ أرجوكم اتصلوا بالاسعاف بسرعة والمسؤولين تاني فيهم الل قال برن وفيه ال لسه بيتفرج،
وبعد ما ممر حوالي 20-25 دقيقة من السقوط (علي الاقل يمكن اكتر كمان)،
نسمع أخيرا ان الإسعاف جت والشباب بتوسع لأن أخيرا حاجة حصلت في مصلحة البنت
ونلاقي المسعف نازل بيتدلع وحاطط أيده في وسطه ومش همه روح البنت ومتحركش
لدرجة ان أحد الشباب بئا واقف وراه بيزقه علشان يجري يلحق البنت وحضرته بيقول أعمل اي مهي كدة كدة مي.ته "وللعلم هو مكنش حتى شاف الطالبة"
اه صحيح نسيت أقولكم قبل ما المسعف ييجي نلاقي نقالة الإسعاف جاية بدون المسعف، اه صدقني زي ما بقولك كدة النقاله جت قبل ما المسعف يدخل اصلا و مش عارفين ازاي هنشيل البنت لأن مينفعش نشلها ممكن تتشال شيلة غلط ونبص للمسؤولين ها اي العمل
وإذ نلاقي الإجابة انزلوا شلوها انتم وينزل الشباب يشيلوها ومعاهم دكتور وبيشيلوا البنت ويحطوها علي النقالة وهنا المسعف شرف أخيرا ولما لقى ناس كتير بدأ يجري أخيرا وكأن الجري هنا لقطه مش واجب عليه...
تعليقات